Roberto Bordin: "Qələbə qazanmaq üçün oyuna maksimum köklənəcəyik" | Neftçi PFK

“Neftçi” Peşəkar Futbol Klubu

Roberto Bordin: "Qələbə qazanmaq üçün oyuna maksimum köklənəcəyik"

Roberto Bordin: "Qələbə qazanmaq üçün oyuna maksimum köklənəcəyik"

Avropa Liqasının birinci təsnifat mərhələsi çərçivəsində iyulun 18-i saat 21:00-da "Bakcell Arena” stadionunda keçiriləcək "Neftçi” – "Sperantsa” oyunu öncəsi komandamızın baş məşqçisi Roberto Bordinin və kapitan Emin Mahmudovun iştirakı ilə mətbuat konfransı təşkil olunub. Əvvəlcə təcrübəli futbolçu oyun haqda fikirlərini bildirib: "Səfərdən 3:0 hesablı qələbə ilə dönmüşük. Buna baxmayaraq oyuna ciddi hazırlaşmışıq. Hücum futbolu oynamağa çalışacağıq”.


Mahmudov jurnalistlərin suallarını da cavablandırıb: "Moldovada "Saburtalo”ya 0:3 hesabı ilə uduzan "Şerif” dünən səfərdə ilk 10 dəqiqədə 3 qol vurdu. Diqqətli olmalıyıq”.


Sonra söz baş məşqçiyə verilib: "Sabah bizi çətin oyun gözləyir. Bu, futboldur. Futbolda gözlənilməz nəticələr tez-tez olur. Ona görə də qələbə qazanmaq üçün oyuna maksimum köklənəcəyik. İlk oyundakı nəticə bizi aldatmamalıdır. Maksimum diqqətli olmalıyıq. İlk oyunda da rəqib bizə çətinliklər yaratmışdı. Fasiləyədək real qol imkanları vardı, amma Səlahət Ağayev bizi xilas etdi. Sonra da qol imkanları oldu, amma istifadə edə bilmədilər”.


Roberto Bordinin KİV nümayəndələrinin suallarına cavabı belə olub: "Start heyətini bugünkü məşqdən sonra müəyyənləşdirəcəyik. Həm Baqali Dabo, həm də Soni Mustivar bizim üçün vacib futbolçulardır. Soni artıq əsas komanda ilə məşqlərə başlayıb. Son həftəni yaxşı çalışıb. Yüksək xarakterə malik futbolçudur. Heç vaxt təslim olmur. Öz üzərində çalışır. Bu da yaxşı hazırlaşmasına səbəb olur. Ola bilər ki, sabah heyətdə onu da görəsiz. Daboda da irəliləyiş var. Həkimlərin tapşırığı ilə bərpa məşqlərini davam etdirir. Onu da yaxın vaxtlarda meydanda görə biləcəksiz. Hazırda yalnız "Sperantsa” ilə oyunu düşünürəm. Bu mərhələni keçəndən sonra digər mövzular haqda da düşünəcəyik. Çalışacağıq ki, hücum futbolu göstərək, oyuna diqtə edən tərəf biz olaq, əvvəldən sonadək aqressiv oynayaraq qələbə qazanaq. İstənilən hesablı qələbə məni qane edəcək. Səfər matçında mənə vacib olan komandamızın oyuna yanaşması idi. Moldovada çempionat davam etdiyindən rəqib daha hazırlıqlı ola bilər. Bununla belə, futbolçularımız oyuna ciddi yanaşdılar. Düzdür, bəzi səhvlərimiz oldu, amma ilk oyundan razı qaldım. Rəqib baş məşqçinin ilk görüşdən sonra dediklərinə şərh vermək istəmirəm. Əsas odur, gözəl oyun nümayiş etdirib qələbə qazanaq. Voislav Stankoviçə ilk görüşdə şans verməməyimə gəlincə, komandamızda 6 arxa xətt oyunçusu var. Bunların 4-ü mərkəz, 2-si cinah müdafiəçisidir. Müdafiədə güclü rəqabət var. Həmin an üçün düşündüm ki, Mbodjla Petrov cütlüyünə şans verim. Bununla belə, bugünkü məşqdən sonra dəyişiklik ola bilər”.


Konfransdan sonra komandamızın ilk 15 dəqiqəsi media nümayəndələri üçün açıq olan məşqi baş tutub.



Fifa


UEFA


AFFA


PFL


ECA


SOCAR


THY


Vita1000


MeqaSigorta