Mübariz Zeynalov | Neftçi PFK

“Neftçi” Peşəkar Futbol Klubu

Mübariz Zeynalov

Mübariz Zeynalov "Neftçi”nin yarandığı gündən düz 8 il sonra, 1945-ci il mart ayının 18-də Gəncə şəhərində dünyaya gəlib. Uşaq yaşlarından futbola böyük həvəsi olub. "Alüminium zavodu” komandasında futbol oynayan Ağa Abbasov adlı qonşusu küçədə 15-16 yaşlı Mübarizin oyununu görüb onu komandaya dəvət edib. Orada məşqçilər tərəfindən bəyənilən Zeynalov bir müddət "Alüminium zavodu” komandasında çıxış edib. Mübariz Zeynalov 17 yaşında isə SSRİ çempionatının ikinci dəstəsində çıxış edən Gəncənin "Dinamo” klubuna cəlb olunub. 1964-cü ildə onu "Dinamo”nun əsas heyətinə cəlb edilib. Bir il sonra komandanın SSRİ çempionatının güclülər dəstəsinə vəsiqə qazanmasında Mübariz Zeynalovun da müstəsna rolu olub.

1966-cı ilin may ayında Bakıda "Dinamo” - "Krasnodar” oyunu baş tutub. Görüş başa çatdıqdan sonra "Neftçi”nin rəisi və baş məşqçisi Viktor Sokolov, eləcə də Ali Sovetin Rəyasət Heyəti sədrinin müşaviri Tofiq Bağırov paltardəyişmə otağına gələrək Mübariz Zeynalov ilə Nizami Salahova Bakıda, "Neftçi” klubunda qalmasını təklif ediblər. Bununla da may ayında ölkənin əsas komandasına dəvət olunan Zeynalov mövsümün sonunadək 20 oyun keçirərək "Neftçi”nin bürünc medullar qazanmasında da pay sahibi olub. Komandaya may ayında qoşulmasına baxmayaraq, 20 oyunda, yəni görüşlərin 50 faizindən çoxunda iştirak etdiyi üçün bürünc medala layiq görülən 12 futbolçudan biri kimi tarixə düşüb.


  

 

O dövrdə qəzetlərdən birində dərc olunmuş məqalədə İngiltərə yığma komandasının oyunçusu Bolun şərəfinə Mübariz Zeynalov haqqında "Azərbaycanın Bolu” deyə yazı yer almışdı. Lakin 1968-ci ildə dizindən aldığı ciddi zədədən sonra Moskvada əməliyyat olunaraq, 1 il futboldan kənarda qalmalı olub. 1969-cu il mövsümün yarısından yenidən oynamağa başlasa da, zədə özünü göstərdiyindən Mübariz Zeynalov əvvəlki oyun formasını bərpa edə bilməyib. Məhz bu səbəbdən 1972-ci ildə "Neftçi”dən ayrılan hücumameylli yarımmüdafiəçi Gəncəyə qayıdaraq daha iki il oynadıqdan sonra 1974-cü ildə, 29 yaşında futbolçu karyerasını başa vurub.

Bununla belə, o, sevdiyi idman növündən birdəfəlik ayrı düşmədi.
1992-ci ildə Ruslan Abdullayev və Ağasəlim Mircavadovla birgə Azərbaycan milli komandasının ilk məşqçilərindən olan Mübariz Zeynalov 1993-cü ildə 1 il müddətinə "Kəpəz” klubunun baş məşqçisi təyin edildi. 2015-ci il martın 31-dən ömrünün son gününədək (8 avqust) "Neftçi” PFK-nın Müşahidə Şurasının üzvü vəzifəsində çalışıb.

 

  

 

Fifa


UEFA


AFFA


PFL


ECA


SOCAR


ASAN


Acibadem


pwc


No To Racism